ގަވާއިދާ ހިލާފަށް ޕްލާސްޓިކް ކޮތަޅުތަކެއް އެތެރެކުރަން އުޅުނު ފަރާތެއް ޖޫރިމަނާ ކޮށްފި

ބަޔޯޑިގްރޭޑަބަލް ކޮތަޅު ޝިޕްމަންޓެއްގެ ތެރޭގައި ފޮރުވައިގެން ޕްލާސްޓިކް ކޮތަޅުތަކެއް ރާއްޖެ އެތެރެ ކުރަން މިދިޔަ ބުދަ ދުވަހު އުޅުނު ފަރާތެއް 56،000ރ. އިން ޖޫރިމަނާކޮށްފި ކަމަށް މޯލްޑިވްސް ކަސްޓަމްސް އިން މިއަދު ބުނެފި އެވެ.

ކަސްޓަމްސް އިން ބުނީ އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) ގެ ހުއްދަ ވެސް ލިބިގެން އަދި ޑިއުޓީ ފްރީކޮށް އެތެރެކުރަން ކުރަން އުޅުނު ބަޔޯޑީގްރޭޑަބަލް ކޮތަޅުގެ ތެރެއިން 675 ދާގީނާ އަކީ ޕޮލީތިއަން ކޮތަޅު ކަމަށެވެ. އަދި އެ ތަކެތީގެ އިމްޕޯޓް ޑިއުޓީގެ ގޮތުގައި 5،23،243.23ރ. ދައްކަންޖެހެ އެވެ.

"މި ފައިސާ އާއި ޖޫރިމަނާ އެ ފަރާތުން ވަނީ މިހާރު ދައްކައިފަ އެވެ. މި މައްސަލަ މިހާރު ގެންދަނީ ކަސްޓަމްސްގެ ފަރާތުން އިތުރަށް ބަލަމުންނެވެ،" ކަސްޓަމްސްގެ ބަޔާނުގައިވެ އެވެ.

ޕްލާސްޓިކް ކޮތަޅަކީ 400 ޕަސެންޓް ޑިއުޓީ ދައްކަންޖެހޭ އެއްޗެކެވެ. އެކަމަކު ބަޔޯޑިގްރޭޑަބަލް ނުވަތަ ތިމާވެއްޓާ ރައްޓެހި ކޮތަޅު، އީޕީއޭގެ ހުއްދައާ އެކު ރާއްޖެ އެތެރެކުރާނަމަ ޑިއުޓީ ދައްކަން ނުޖެހެ އެވެ.

.